ଆବାସ ଘର ନିର୍ମାଣ ପାଇଁ ମିର୍ଜା ତବାରକଙ୍କୁ ନିଜସ୍ୱ ପାଣ୍ଠିରୁ ୩୦ ହଜାର ଟଙ୍କା ପ୍ରଦାନ
ଭଦ୍ରକ (ଓଡ଼ିଶ୍ରୀ ସମ୍ବାଦ): ଅସହାୟ ପରିବାରର ଦୁଃଖ ସମୟରେ ସହଯୋଗର ହାତ ବଢ଼ାଇଛନ୍ତି ଭଦ୍ରକ ବିଧାୟକ ଶିତାଂଶୁ ଶେଖର ମହାପାତ୍ର। ଭଦ୍ରକ ପୌରପାଳିକାର ୨୯ ନମ୍ବର ୱାର୍ଡ ଅନ୍ତର୍ଗତ ଦୁର୍ଗାପୁର ଗ୍ରାମର ଗରିବ ଶ୍ରମଜୀବୀ ମିର୍ଜା ତବାରକଙ୍କୁ ସେ ୩୦ ହଜାର ଟଙ୍କାର ଆର୍ଥିକ ସହାୟତା ପ୍ରଦାନ କରିଛନ୍ତି।
ସୂଚନା ଅନୁଯାୟୀ, ତବାରକ ଆବାସ ଯୋଜନାରେ ଘର ନିର୍ମାଣ ପାଇଁ ପାଇଥିବା ୩୦ ହଜାର ଟଙ୍କା ହଜିଯାଇଥିଲା। ଫଳରେ ନିଜ ଘର ନିର୍ମାଣ କରିବାର ଆଶା ତାଙ୍କ ପାଇଁ ଅନିଶ୍ଚିତ ହୋଇପଡ଼ିଥିଲା। ଏହି ଘଟଣା ସମ୍ପର୍କରେ ଖବର ପାଇ ବିଧାୟକ ଶ୍ରୀ ମହାପାତ୍ର ତବାରକଙ୍କ ଘରେ ପହଞ୍ଚି ପରିବାରର ସ୍ଥିତି ବୁଝିଥିଲେ।
ତବାରକଙ୍କ ଘର ନିର୍ମାଣ କାର୍ଯ୍ୟ ଯେପରି ଅଟକି ନଯାଏ, ସେଥିପାଇଁ ବିଧାୟକ ନିଜସ୍ୱ ପାଣ୍ଠିରୁ ୩୦ ହଜାର ଟଙ୍କା ସହାୟତା ଦେଇଥିଲେ। ଏହି ସହଯୋଗ ପାଇଁ ତବାରକ ଓ ତାଙ୍କ ପରିବାର ବିଧାୟକଙ୍କୁ କୃତଜ୍ଞତା ଜଣାଇଛନ୍ତି।
ଜଣେ ଜନପ୍ରତିନିଧିଙ୍କ ଏଭଳି ବ୍ୟକ୍ତିଗତ ସହଯୋଗକୁ ନେଇ ସ୍ଥାନୀୟ ଅଞ୍ଚଳରେ ଆଲୋଚନା ହେଉଛି।