ରାଜପଥ କଡ଼ରେ ବିପଜ୍ଜନକ ପାର୍କିଂ, ଦୁର୍ଘଟଣା ଆଶଙ୍କା; ମୌଳିକ ସୁବିଧା ଅପେକ୍ଷାରେ ଟ୍ରକ୍ ଚାଳକ
ଚାରମାଳ, (ଓଡ଼ିଶ୍ରୀ ସମ୍ବାଦ): ଦୀର୍ଘଦିନ ଧରି ଅଧାପନ୍ତରିଆ ଅବସ୍ଥାରେ ପଡ଼ିରହିଛି ଚାରମାଳ ଅଞ୍ଚଳରେ ପ୍ରସ୍ତାବିତ ଟ୍ରକ୍ ଟର୍ମିନାଲ୍। ଏହା କେବେ ସମ୍ପୂର୍ଣ୍ଣ ଭାବେ କାର୍ଯ୍ୟକ୍ଷମ ହେବ, ତାହାକୁ ନେଇ ସ୍ଥାନୀୟ ବାସିନ୍ଦା ଓ ଟ୍ରକ୍ ଚାଳକଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଛି। ଜାତୀୟ ରାଜପଥ ପାର୍ଶ୍ୱରେ ସୁରକ୍ଷିତ ପାର୍କିଂ ସୁବିଧା ଯୋଗାଇବା ଏବଂ ଦୁର୍ଘଟଣା ରୋକିବା ଉଦ୍ଦେଶ୍ୟରେ ଏହି ଟର୍ମିନାଲ୍ ନିର୍ମାଣ ଯୋଜନା ହୋଇଥିଲେ ମଧ୍ୟ ଏହାର କାର୍ଯ୍ୟ ସମ୍ପୂର୍ଣ୍ଣ ହୋଇନଥିବା ଅଭିଯୋଗ ହୋଇଛି।
ରାଜପଥ କଡ଼ରେ ବିପଜ୍ଜନକ ପାର୍କିଂ
ଟର୍ମିନାଲ୍ କାର୍ଯ୍ୟକ୍ଷମ ନହେବାରୁ ପ୍ରତିଦିନ ଶତାଧିକ ମାଲବାହୀ ଗାଡ଼ି ଜାତୀୟ ରାଜପଥ କଡ଼ରେ ପାର୍କିଂ ହେଉଥିବା ସ୍ଥାନୀୟ ଲୋକେ କହିଛନ୍ତି। ଏହା ଫଳରେ ସାଧାରଣ ଯାତ୍ରୀ, ବାଇକ୍ ଚାଳକ ଓ ପଥଚାରୀଙ୍କ ଯାତାୟାତରେ ସମସ୍ୟା ସୃଷ୍ଟି ହେଉଛି। ବିଶେଷ କରି ରାତି ସମୟରେ ରାସ୍ତା କଡ଼ରେ ଠିଆ ହୋଇଥିବା ଭାରୀଯାନ ଯୋଗୁଁ ଦୁର୍ଘଟଣାର ଆଶଙ୍କା ବଢ଼ୁଥିବା ଅଭିଯୋଗ ହୋଇଛି।
ମୌଳିକ ସୁବିଧାରୁ ବଞ୍ଚିତ ଟ୍ରକ୍ ଚାଳକ
ଦୂରଦୂରାନ୍ତରୁ ଆସୁଥିବା ଟ୍ରକ୍ ଚାଳକ ଓ ହେଲପରମାନଙ୍କ ପାଇଁ ଟର୍ମିନାଲ୍ ପରିସରରେ ବିଶ୍ରାମ ଗୃହ, ବିଶୁଦ୍ଧ ପାନୀୟ ଜଳ, ଶୌଚାଳୟ ଓ ଗାଡ଼ି ମରାମତି ଭଳି ଆନୁଷଙ୍ଗିକ ସୁବିଧା ରଖିବାର ଯୋଜନା ରହିଛି। ମାତ୍ର ପ୍ରକଳ୍ପଟି ସମ୍ପୂର୍ଣ୍ଣ ହୋଇନଥିବାରୁ ଚାଳକମାନେ ଏହି ସୁବିଧା ପାଇପାରୁନାହାନ୍ତି। ଅନେକ ସମୟରେ ସେମାନଙ୍କୁ ରାସ୍ତାକଡ଼ରେ ଖୋଲା ଆକାଶ ତଳେ ରହିବା ଓ ରୋଷେଇ କରିବାକୁ ପଡ଼ୁଥିବା କୁହାଯାଇଛି।
ଟର୍ମିନାଲ୍ କାର୍ଯ୍ୟକ୍ଷମ କରିବାକୁ ଦାବି
ଚାରମାଳବାସୀ ଓ ରାଶିବେଡ଼ା ଯୁବକ ସଂଘ ପକ୍ଷରୁ ପ୍ରକଳ୍ପର ଅଗ୍ରଗତି ସମୀକ୍ଷା କରି ଏହାକୁ ଶୀଘ୍ର ସମ୍ପୂର୍ଣ୍ଣ ଓ କାର୍ଯ୍ୟକ୍ଷମ କରିବାକୁ ସରକାର ଏବଂ ଜିଲ୍ଲା ପ୍ରଶାସନ ନିକଟରେ ଦାବି ହୋଇଛି। ଦାବି ପୂରଣ ନହେଲେ ଆଗାମୀ ଦିନରେ ରାଜପଥ ଅବରୋଧ ଭଳି ଆନ୍ଦୋଳନ କରାଯିବ ବୋଲି ଅଞ୍ଚଳବାସୀ ଓ ଚାଳକ ସଂଘ ଚେତାବନୀ ଦେଇଛନ୍ତି।
ଏବେ ପ୍ରଶ୍ନ ଉଠୁଛି, ଚାରମାଳ ଟ୍ରକ୍ ଟର୍ମିନାଲ୍ କେବେ ସମ୍ପୂର୍ଣ୍ଣ ହେବ ଏବଂ ଚାଳକମାନେ କେବେ ଏହାର ସୁବିଧା ପାଇବେ?