ପଞ୍ଚାୟତରୁ ବ୍ଲକ୍ କାର୍ଯ୍ୟାଳୟ ଦୌଡ଼ି ନିରାଶ ବଣ୍ଡାଲୁ ମୁଠାମାଝି; ଆବେଦନର ସ୍ଥିତି ଯାଞ୍ଚ କରିବାକୁ ଦାବି
ବାଲିଗୁଡ଼ା, (ଓଡ଼ିଶ୍ରୀ ସମ୍ବାଦ): ସରକାରୀ ଯୋଜନାରେ ଆବେଦନ କରିବାର ପାଞ୍ଚ ମାସ ପରେ ମଧ୍ୟ ମିଳିନାହିଁ ବାର୍ଦ୍ଧକ୍ୟ ଭତ୍ତା। ଭତ୍ତା ପାଇବା ଆଶାରେ ପଞ୍ଚାୟତ କାର୍ଯ୍ୟାଳୟଠାରୁ ବ୍ଲକ୍ କାର୍ଯ୍ୟାଳୟ ପର୍ଯ୍ୟନ୍ତ ଦୌଡ଼ି ନିରାଶ ହୋଇଛନ୍ତି ଜଣେ ବୃଦ୍ଧା। ଏଭଳି ଅଭିଯୋଗ ଆସିଛି କନ୍ଧମାଳ ଜିଲ୍ଲା ଦାରିଙ୍ଗବାଡ଼ି ବ୍ଲକ୍ ଅନ୍ତର୍ଗତ ସାରାମୂଳୀ ପଞ୍ଚାୟତର ମାର୍ଦ୍ଧିଫଙ୍କା ଗ୍ରାମରୁ।
ଗ୍ରାମର ବଣ୍ଡାଲୁ ମୁଠାମାଝିଙ୍କ ବୟସ ୬୦ ବର୍ଷ ଅତିକ୍ରମ କରିଛି। ବାର୍ଦ୍ଧକ୍ୟ ଭତ୍ତା ପାଇବା ଆଶାରେ ସେ ପ୍ରାୟ ପାଞ୍ଚ ମାସ ପୂର୍ବେ ଆବେଦନ କରିଥିଲେ। କିନ୍ତୁ ଏତେ ଦିନ ବିତିଯାଇଥିଲେ ମଧ୍ୟ ଆବେଦନର କୌଣସି ସୁଫଳ ମିଳିନଥିବା ସେ ଅଭିଯୋଗ କରିଛନ୍ତି।
ଭତ୍ତା ସମ୍ପର୍କରେ ଖବର ନେବା ପାଇଁ ବୃଦ୍ଧା ଜଣକ ବାରମ୍ବାର ପଞ୍ଚାୟତ ଓ ବ୍ଲକ୍ କାର୍ଯ୍ୟାଳୟକୁ ଯାଇଥିଲେ ମଧ୍ୟ ସମସ୍ୟାର ସମାଧାନ ହୋଇନଥିବା ଜଣାପଡ଼ିଛି। ବୟସର ଏହି ପର୍ଯ୍ୟାୟରେ ଭତ୍ତା ତାଙ୍କ ପାଇଁ ଆର୍ଥିକ ସହାୟତାର ଏକ ମାଧ୍ୟମ ହୋଇଥିବାରୁ ଏହା ନମିଳିବା ତାଙ୍କୁ ଚିନ୍ତାରେ ପକାଇଛି।
ପାଞ୍ଚ ମାସ ଧରି ଆବେଦନଟି କେଉଁଠି ଅଟକି ରହିଛି ଏବଂ ହିତାଧିକାରୀ ତାଲିକାରେ ତାଙ୍କ ନାମ ସାମିଲ ନହେବାର କାରଣ କ’ଣ, ତାହା ଏବେ ପ୍ରଶ୍ନବାଚୀ ସୃଷ୍ଟି କରିଛି।
ଏଣୁ ଦାରିଙ୍ଗବାଡ଼ି ବିଡିଓ ଓ ସମ୍ପୃକ୍ତ ପଞ୍ଚାୟତ ଅଧିକାରୀ ଘଟଣାରେ ହସ୍ତକ୍ଷେପ କରି ବଣ୍ଡାଲୁ ମୁଠାମାଝିଙ୍କ ଆବେଦନର ସ୍ଥିତି ଯାଞ୍ଚ କରିବା ସହ ଆବଶ୍ୟକ କାଗଜପତ୍ର ଓ ଯୋଗ୍ୟତା ଅନୁଧ୍ୟାନ କରିବାକୁ ଦାବି ହୋଇଛି। ନିୟମ ଅନୁଯାୟୀ ସେ ଯୋଗ୍ୟ ବିବେଚିତ ହେଲେ ତାଙ୍କୁ ଭତ୍ତା ପ୍ରଦାନର ବ୍ୟବସ୍ଥା କରିବାକୁ ଅଞ୍ଚଳବାସୀ ଅନୁରୋଧ କରିଛନ୍ତି।