ଖଲ୍ଲିକୋଟ, (ଓଡ଼ିଶ୍ରୀ ସମ୍ବାଦ): ଖଲ୍ଲିକୋଟର ପ୍ରାଚୀନ ଶ୍ରୀଜଗନ୍ନାଥ ମନ୍ଦିରର ସିଂହଦ୍ୱାର ନିକଟ ଗମ୍ଭୀରା ଉପରୁ ଏକ ବିଶାଳ ପଥର ଖସିପଡ଼ିଥିବା ଦେଖିବାକୁ ମିଳିଛି। ଏହାର ପୂର୍ବଦିନ ମଧ୍ୟ ସମାନ ସ୍ଥାନରୁ ପଥର ଖସିଥିବା ଅଭିଯୋଗ ହୋଇଛି। ମନ୍ଦିରର ପ୍ରାଚୀନ କାରୁକାର୍ଯ୍ୟ ଓ ସ୍ଥାପତ୍ୟର ରକ୍ଷଣାବେକ୍ଷଣକୁ ନେଇ ଏବେ ସ୍ଥାନୀୟ ଅଞ୍ଚଳରେ ଚିନ୍ତା ପ୍ରକାଶ ପାଇଛି।
ସ୍ଥାନୀୟ ଲୋକଙ୍କ ଅଭିଯୋଗ ଅନୁଯାୟୀ, ମନ୍ଦିରର ସୂକ୍ଷ୍ମ କାରୁକାର୍ଯ୍ୟ ଉପଯୁକ୍ତ ରକ୍ଷଣାବେକ୍ଷଣ ଅଭାବରୁ ଧୀରେ ଧୀରେ ନଷ୍ଟ ହେବା ସହ ଏହାର ଅଂଶବିଶେଷ ଖସିପଡ଼ୁଛି। ପ୍ରାୟ ପାଞ୍ଚ ମାସ ପୂର୍ବେ ବଡ଼ ଦେଉଳ ଉପରେ ଥିବା ପ୍ରାୟ ୬ ଫୁଟ ଉଚ୍ଚତାର ଏକ ସିଂହ ମୂର୍ତ୍ତି ଭାଙ୍ଗି ତଳେ ପଡ଼ିଥିବା ମଧ୍ୟ ସେମାନେ ଦାବି କରିଛନ୍ତି। ବାରମ୍ବାର ଏଭଳି ଘଟଣା ଘଟୁଥିବାରୁ ମନ୍ଦିରର ସୁରକ୍ଷା ଓ ଭବିଷ୍ୟତକୁ ନେଇ ପ୍ରଶ୍ନ ଉଠିଛି।
ଐତିହାସିକ ମହତ୍ତ୍ୱ ବହନ କରୁଥିବା ଏହି ମନ୍ଦିର ସହ ଅଞ୍ଚଳର ଧାର୍ମିକ ଓ ସାଂସ୍କୃତିକ ଭାବନା ଜଡ଼ିତ ରହିଛି। ତେଣୁ ଏହାର ପ୍ରାଚୀନ ସ୍ଥାପତ୍ୟ ଓ କାରୁକାର୍ଯ୍ୟର ସୁରକ୍ଷା ପାଇଁ ତୁରନ୍ତ ପଦକ୍ଷେପ ନେବାକୁ ସାଧାରଣରେ ଦାବି ହେଉଛି।
ମନ୍ଦିରରେ ଅବ୍ୟବସ୍ଥା ଏବଂ ପଣ୍ଡା-ସୁଆରଙ୍କ କାର୍ଯ୍ୟଶୈଳୀକୁ ନେଇ ମଧ୍ୟ ସ୍ଥାନୀୟ ଲୋକେ ଅସନ୍ତୋଷ ପ୍ରକାଶ କରିଥିବା ଅଭିଯୋଗ ହୋଇଛି। ଏ ସମ୍ପର୍କରେ ମନ୍ଦିରର କାର୍ଯ୍ୟନିର୍ବାହୀ ଅଧିକାରୀ ଡି. ମଲେଶ୍ୱର ପାତ୍ର ଏବଂ ମନ୍ଦିର କମିଟିକୁ ଜଣାଇବା ସତ୍ତ୍ୱେ ଆବଶ୍ୟକ ପଦକ୍ଷେପ ନିଆଯାଉନଥିବା ସେମାନେ ଅଭିଯୋଗ କରିଛନ୍ତି। ତେବେ ଏହି ଅଭିଯୋଗ ଉପରେ ସମ୍ପୃକ୍ତ ଅଧିକାରୀ କିମ୍ବା ମନ୍ଦିର କମିଟିର ପ୍ରତିକ୍ରିୟା ମିଳିନାହିଁ।
ବର୍ତ୍ତମାନ ପ୍ରମୁଖ ପ୍ରଶ୍ନ ହେଉଛି, ମନ୍ଦିରର ସ୍ଥାପତ୍ୟର ସ୍ଥିତି ଯାଞ୍ଚ କରି ଆବଶ୍ୟକ ମରାମତି ଓ ସଂରକ୍ଷଣ କାର୍ଯ୍ୟ କେବେ ଆରମ୍ଭ ହେବ? ଏହି ପ୍ରାଚୀନ ଧାର୍ମିକ ଐତିହ୍ୟର ସୁରକ୍ଷା ପାଇଁ ଜିଲ୍ଲା ପ୍ରଶାସନ ଓ ରାଜ୍ୟ ସରକାର ତୁରନ୍ତ ଦୃଷ୍ଟି ଦେବାକୁ ସ୍ଥାନୀୟ ଲୋକେ ଦାବି କରିଛନ୍ତି।