ନୂଆପଡ଼ା ଜିଲ୍ଲା ଆଇନ ସେବା ପ୍ରାଧିକରଣର ପଦକ୍ଷେପ
ନୂଆପଡ଼ା (ଓଡ଼ିଶ୍ରୀ ସମ୍ବାଦ): ଯୌନ ଅପରାଧର ଶିକାର ହୋଇଥିବା ପୀଡ଼ିତାଙ୍କୁ ଆର୍ଥିକ ସହାୟତା ଓ ପୁନର୍ବାସ ସୁବିଧା ଯୋଗାଇଦେବା ଉଦ୍ଦେଶ୍ୟରେ ନୂଆପଡ଼ା ଜିଲ୍ଲା ଆଇନ ସେବା ପ୍ରାଧିକରଣ (DLSA) ପକ୍ଷରୁ ଏକ ପଦକ୍ଷେପ ନିଆଯାଇଛି। ଖଡ଼ିଆଳ ଅଞ୍ଚଳର ଜଣେ ଦୁଷ୍କର୍ମ ପୀଡ଼ିତାଙ୍କୁ ପୀଡ଼ିତା କ୍ଷତିପୂରଣ ଯୋଜନା ଅଧୀନରେ ୫୦ ହଜାର ଟଙ୍କାର ଅନ୍ତରୀଣ କ୍ଷତିପୂରଣ ପ୍ରଦାନ କରାଯାଇଛି।
ଏହି ଅର୍ଥରାଶି ପ୍ରଦାନ ସମୟରେ ଜିଲ୍ଲା ଆଇନ ସେବା ପ୍ରାଧିକରଣର ସଚିବ ନବନୀତା ଦାଶ ଉପସ୍ଥିତ ରହି ପୀଡ଼ିତାଙ୍କୁ ନିଜର ଉନ୍ନତ ଭବିଷ୍ୟତ ଗଠନ ପାଇଁ ମିଳିଥିବା ସହାୟତାର ସଦୁପଯୋଗ କରିବାକୁ ପରାମର୍ଶ ଦେଇଥିଲେ।
ଏହି ଅନ୍ତରୀଣ କ୍ଷତିପୂରଣ ରାଶି ପୀଡ଼ିତାଙ୍କୁ ତତ୍କାଳ ଆର୍ଥିକ ସହାୟତା ଯୋଗାଇବା ସହ ତାଙ୍କର ଆବଶ୍ୟକତା ପୂରଣରେ ସହାୟକ ହେବ। ଅପରାଧର ଶିକାର ହୋଇଥିବା ବ୍ୟକ୍ତିବିଶେଷଙ୍କ ଅଧିକାର, ମର୍ଯ୍ୟାଦା ଓ ପୁନର୍ବାସ ସୁନିଶ୍ଚିତ କରିବା ସହ ସମୟୋଚିତ ସହାୟତା ପ୍ରଦାନ କରିବା ଦିଗରେ DLSA ପକ୍ଷରୁ ଏପରି ପଦକ୍ଷେପ ନିଆଯାଇଛି।