ଭୋର ୫ଟାରେ ଜାତୀୟ ରାଜପଥ କଡ଼ରେ ଚଢ଼ଉ; ଏନ୍ଡିପିଏସ୍ ଆକ୍ଟରେ ମାମଲା, ନେଟୱାର୍କ ନେଇ ତଦନ୍ତ ଜାରି
ବାରିପଦା (ଓଡ଼ିଶ୍ରୀ ସମ୍ବାଦ): ମୟୂରଭଞ୍ଜ ଜିଲ୍ଲା କୁଳିଅଣା ଥାନା ଅନ୍ତର୍ଗତ ବାଲିମୁଣ୍ଡଳୀ ଅଞ୍ଚଳରେ ବେଆଇନ ନିଶା କଫ୍ସିରପ୍ କାରବାର ଉପରେ ଅବକାରୀ ବିଭାଗ ଚଢ଼ଉ କରିଛି। ଏହି ଚଢ଼ଉରେ ୨୧୪ ବୋତଲ କଫ୍ସିରପ୍ ଜବତ ହୋଇଥିବା ବେଳେ ଜଣେ ଅଭିଯୁକ୍ତ ଗିରଫ ହୋଇଛନ୍ତି। ଏଥିସହ ପରିବହନରେ ବ୍ୟବହୃତ ଗାଡ଼ି ଓ ଅନ୍ୟାନ୍ୟ ସାମଗ୍ରୀ ମଧ୍ୟ ଜବତ କରାଯାଇଛି।
ମୟୂରଭଞ୍ଜ ଅବକାରୀ ଅଧୀକ୍ଷକଙ୍କ ନିର୍ଦ୍ଦେଶକ୍ରମେ ବାରିପଦା ଜିଲ୍ଲା ଅବକାରୀ ମୋବାଇଲ୍ ୟୁନିଟ୍ ଇନ୍ସପେକ୍ଟର ଏ. ଜଗାରାଓଙ୍କ ନେତୃତ୍ୱରେ ଏକ ସ୍ୱତନ୍ତ୍ର ଟିମ୍ ଗଠନ କରାଯାଇଥିଲା। ବିଶ୍ୱସ୍ତ ସୂତ୍ରରୁ ସୂଚନା ପାଇ ଟିମ୍ ଭୋର୍ ପ୍ରାୟ ୫ଟା ସମୟରେ ଜାତୀୟ ରାଜପଥ କଡ଼ରେ ଥିବା ବାଲିମୁଣ୍ଡଳୀ ନିକଟରେ ଆକସ୍ମିକ ଚଢ଼ଉ କରିଥିଲା।
ଅବକାରୀ ଟିମ୍ ସେଠାରେ ଜରି ବସ୍ତାରେ ସନ୍ଦେହଜନକ ଭାବେ ରଖାଯାଇଥିବା କଫ୍ସିରପ୍ ଯାଞ୍ଚ କରିଥିଲା। ତଲାସୀ ସମୟରେ ବସ୍ତାରୁ ମୋଟ ୨୧୪ଟି କଫ୍ସିରପ୍ ବୋତଲ ମିଳିଥିଲା। ଏଥିରେ ପ୍ରାୟ ୪୨.୮ ଗ୍ରାମ୍ କୋଡିନ୍ ଫସଫେଟ୍ ଥିବା ପ୍ରାଥମିକ ଭାବେ ଆକଳନ କରାଯାଇଥିବା ବିଭାଗ ପକ୍ଷରୁ ସୂଚନା ମିଳିଛି।
ଘଟଣାସ୍ଥଳରୁ ବାଲିମୁଣ୍ଡଳୀ ଗ୍ରାମର ଗୋବିନ୍ଦା ନାମକ ଜଣେ ବ୍ୟକ୍ତିଙ୍କୁ ଅବକାରୀ ଟିମ୍ ଗିରଫ କରିଛି। ଜବତ କଫ୍ସିରପ୍କୁ ରାସାୟନିକ ପରୀକ୍ଷା ପାଇଁ ପଠାଯାଇଛି। ଏହାର ଚୋରା ଚାଲାଣ ଓ ବିକ୍ରି ପଛରେ ଥିବା ଅନ୍ୟ ବ୍ୟକ୍ତିଙ୍କ ସମ୍ପୃକ୍ତି ନେଇ ମଧ୍ୟ ତଦନ୍ତ ଚାଲିଛି।
ଏହି ଘଟଣାରେ ଏନ୍ଡିପିଏସ୍ ଆଇନ ଅନୁଯାୟୀ ମାମଲା ରୁଜୁ କରାଯାଇ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବା ବିଭାଗ ପକ୍ଷରୁ କୁହାଯାଇଛି। କଫ୍ସିରପ୍ର ପ୍ରକୃତ ଉପାଦାନ ଓ ଏହି କାରବାରରେ ଜଡ଼ିତ ଅନ୍ୟମାନଙ୍କ ସମ୍ପର୍କରେ ତଦନ୍ତ ପରେ ଅଧିକ ତଥ୍ୟ ସାମ୍ନାକୁ ଆସିବ।