୨୫ ଏକର ଜଙ୍ଗଲ ଜମିରେ ହୋଇଥିବା ଚାଷ ନଷ୍ଟ; ଜବତ ଗଞ୍ଜେଇର ଆନୁମାନିକ ମୂଲ୍ୟ ୭୫ ଲକ୍ଷ ଟଙ୍କା
କନ୍ଧମାଳ (ଓଡ଼ିଶ୍ରୀ ସମ୍ବାଦ): କନ୍ଧମାଳ ଜିଲ୍ଲାରେ ବେଆଇନ ଗଞ୍ଜେଇ ଚାଷ ଓ ଚୋରା କାରବାର ବିରୋଧରେ ପୁଲିସର ଅଭିଯାନ ଜାରି ରହିଛି। ଗୋଛାପଡ଼ା ଥାନା ଅନ୍ତର୍ଗତ ସାଲାଗୁଡ଼ା ଓ କତ୍ରିଙ୍ଗିଆ ପଞ୍ଚାୟତ ଅଞ୍ଚଳରେ ଚଢ଼ାଉ କରି ପୁଲିସ ୭୫୦ କିଲୋଗ୍ରାମ ଗଞ୍ଜେଇ ଜବତ କରିଛି। ଏଥିସହ ପ୍ରାୟ ୨୫ ଏକର ଜଙ୍ଗଲ ଜମିରେ ହୋଇଥିବା ଗଞ୍ଜେଇ ଚାଷକୁ ନଷ୍ଟ କରାଯାଇଛି। ଏହି ଘଟଣାରେ ୧୧ ଜଣଙ୍କୁ ଗିରଫ କରାଯାଇଥିବା ପୁଲିସ ସୂତ୍ରରୁ ଜଣାପଡ଼ିଛି। ଜବତ ଗଞ୍ଜେଇର ଆନୁମାନିକ ବଜାର ମୂଲ୍ୟ ୭୫ ଲକ୍ଷ ଟଙ୍କା ହେବ ବୋଲି କୁହାଯାଇଛି।
ପୁଲିସର ସୂଚନା ଅନୁଯାୟୀ, ନଭେମ୍ବର ୩ ତାରିଖରେ ଗୋଛାପଡ଼ା ଥାନା ଅଞ୍ଚଳର ଏକ ଜଙ୍ଗଲ ନିକଟବର୍ତ୍ତୀ ନାଳ ପାର୍ଶ୍ୱରେ ବେଆଇନ ଗଞ୍ଜେଇ ଚାଷ ହେଉଥିବା ନେଇ ଗୁପ୍ତ ସୂଚନା ମିଳିଥିଲା। ଏହାକୁ ଆଧାର କରି ଡିଏସ୍ପି ସୁନୀଲ ଅରୁଣ କୁମାର ନାୟକ, ଏସ୍ଡିପିଓ ଶୁଭ୍ରଜିତ ବିଶ୍ୱାଳ ଓ ଇନ୍ସପେକ୍ଟର ଶୁଭ୍ରଜିତ ସାମନ୍ତରାୟଙ୍କ ନେତୃତ୍ୱରେ ଏକ ସ୍ୱତନ୍ତ୍ର ଟିମ୍ ଚଢ଼ାଉ କରିଥିଲା। ଏହି ସମୟରେ ଫିରିଙ୍ଗିଆର କାର୍ଯ୍ୟନିର୍ବାହୀ ମାଜିଷ୍ଟ୍ରେଟ୍ ଉପସ୍ଥିତ ଥିଲେ।
ଚଢ଼ାଉ ସମୟରେ ୨୫ଟି ପ୍ଲାଷ୍ଟିକ ବସ୍ତାରେ ଲୁଚାଇ ରଖାଯାଇଥିବା ୭୫୦ କେଜି ଗଞ୍ଜେଇ ଜବତ ହୋଇଥିଲା। ପ୍ରାଥମିକ ତଦନ୍ତରୁ ଏହି ଗଞ୍ଜେଇକୁ ବୌଦ୍ଧ ଜିଲ୍ଲା ଦେଇ ରେଳପଥ ମାଧ୍ୟମରେ ମଧ୍ୟପ୍ରଦେଶକୁ ଚାଲାଣ କରିବା ପାଇଁ ଯୋଜନା ହୋଇଥିବା ପୁଲିସ ଜାଣିବାକୁ ପାଇଥିବା କହିଛି।
ଅନ୍ୟପକ୍ଷରେ, ଜଙ୍ଗଲ ଜମିର ପ୍ରାୟ ୨୫ ଏକର ଅଞ୍ଚଳରେ ଚାଷ କରାଯାଇଥିବା ଗଞ୍ଜେଇ ଗଛକୁ ଚିହ୍ନଟ କରି ଉପାଡ଼ି ନଷ୍ଟ କରାଯାଇଛି। ଏହି ମିଳିତ ଅଭିଯାନରେ କନ୍ଧମାଳ ପୁଲିସ ସହ ଅବକାରୀ, ବନ ଓ ରାଜସ୍ୱ ବିଭାଗର ଅଧିକାରୀ ଓ କର୍ମଚାରୀ ସାମିଲ ହୋଇଥିଲେ। ପ୍ରାୟ ୫୦ ଜଣ କର୍ମଚାରୀଙ୍କୁ ନେଇ ହୋଇଥିବା ଏହି ଅଭିଯାନକୁ ଡ୍ରୋନ୍ ମାଧ୍ୟମରେ ନିରୀକ୍ଷଣ କରାଯାଇଥିଲା।
ଏନେଇ ଗୋଛାପଡ଼ା ଥାନାରେ କେସ୍ ନମ୍ବର ୧୮୩/୨୦୨୬ରେ ଏନ୍ଡିପିଏସ୍ ଆଇନ, ୧୯୮୫ ଅନୁଯାୟୀ ମାମଲା ରୁଜୁ ହୋଇଛି। ଗିରଫ ହୋଇଥିବା ୧୧ ଜଣ ହେଲେ ଶମ୍ଭୁନାଥ ଦିଗାଲ, ସୁମନୁ ଦିଗାଲ, ଗୋପୀନାଥ ଦିଗାଲ, ଗୌତମ ଦିଗାଲ, ସନ୍ଥନୁ ଦିଗାଲ, ନିରଞ୍ଜନ ଥେଲା, ଚନ୍ଦନ ଦିଗାଲ, ହର ଦିଗାଲ, ଟିଟୁ ଦିଗାଲ, ସୁନତ ଦିଗାଲ ଓ ସୁଶାନୁ ଦିଗାଲ।
ବେଆଇନ ନିଶାଦ୍ରବ୍ୟ ଚାଷ ଓ ଚୋରା କାରବାର ରୋକିବା ପାଇଁ ଆଗାମୀ ଦିନରେ ମଧ୍ୟ ଏଭଳି ଅଭିଯାନ ଜାରି ରହିବ ବୋଲି କନ୍ଧମାଳ ପୁଲିସ ପକ୍ଷରୁ କୁହାଯାଇଛି। ଏ ସମ୍ପର୍କରେ କୌଣସି ସୂଚନା ଥିଲେ ପୁଲିସକୁ ଜଣାଇବାକୁ ଜନସାଧାରଣଙ୍କୁ ଅପିଲ୍ କରାଯାଇଛି।