ମାଲିଗୁଡ଼ାରେ ହେଲ୍ପରଙ୍କ ଦ୍ୱାରା କେନ୍ଦ୍ର ପରିଚାଳନା ଅଭିଯୋଗ; ଗୌଡ଼ କଙ୍କଡ଼ାପୁଟ କେନ୍ଦ୍ର ବନ୍ଦ ଥିବା ନଜରକୁ ଆସିଲା, ତଦାରଖ ଉପରେ ଉଠିଲା ପ୍ରଶ୍ନ
କୋରାପୁଟ, ଲକ୍ଷ୍ମୀପୁର, (ଓଡ଼ିଶ୍ରୀ ସମ୍ବାଦ): ଶିଶୁଙ୍କ ପୋଷଣ, ପ୍ରାକ୍-ଶିକ୍ଷା ଏବଂ ଗର୍ଭବତୀ ଓ ପ୍ରସୂତି ମହିଳାଙ୍କୁ ସରକାରୀ ସେବା ଯୋଗାଇବାରେ ଅଙ୍ଗନୱାଡ଼ି କେନ୍ଦ୍ରର ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ତେବେ କୋରାପୁଟ ଜିଲ୍ଲାର ଲକ୍ଷ୍ମୀପୁର ବ୍ଲକର କେତେକ ଅଙ୍ଗନୱାଡ଼ି କେନ୍ଦ୍ରରେ ପରିଚାଳନାଗତ ଅବ୍ୟବସ୍ଥା ଥିବା ଅଭିଯୋଗ ସାମ୍ନାକୁ ଆସିଛି। କେଉଁଠି ହେଲ୍ପରଙ୍କ ଭରସାରେ କେନ୍ଦ୍ର ଚାଲୁଥିବା ବେଳେ ଆଉ କେଉଁଠି କେନ୍ଦ୍ରରେ ତାଲା ଝୁଲୁଥିବା ଦେଖିବାକୁ ମିଳିଛି। ଏହାକୁ ନେଇ ବିଭାଗୀୟ ତଦାରଖ ବ୍ୟବସ୍ଥା ଉପରେ ପ୍ରଶ୍ନ ଉଠିଛି।
ସୂଚନା ଅନୁଯାୟୀ, ଲକ୍ଷ୍ମୀପୁର ବ୍ଲକ କାକିରିଗୁମା ଗ୍ରାମ ପଞ୍ଚାୟତ ଅନ୍ତର୍ଗତ ମାଲିଗୁଡ଼ା ଅଙ୍ଗନୱାଡ଼ି କେନ୍ଦ୍ରରେ ହେଲ୍ପରଙ୍କ ଦ୍ୱାରା କେନ୍ଦ୍ର ପରିଚାଳିତ ହେଉଥିବା ଦେଖାଯାଇଥିଲା। ସେହିପରି ଭିତରଗଡ଼ ଗ୍ରାମ ପଞ୍ଚାୟତ ଅନ୍ତର୍ଗତ ଗୌଡ଼ କଙ୍କଡ଼ାପୁଟ ଅଙ୍ଗନୱାଡ଼ି କେନ୍ଦ୍ରରେ ତାଲା ଝୁଲୁଥିବା ନଜରକୁ ଆସିଥିଲା। ଏହି ଦୁଇଟି ଘଟଣା କେନ୍ଦ୍ରଗୁଡ଼ିକର ନିୟମିତ ପରିଚାଳନା ଓ ଦାୟିତ୍ୱ ନିର୍ବାହକୁ ନେଇ ଚିନ୍ତା ସୃଷ୍ଟି କରିଛି।
ଘଟଣା ସମ୍ପର୍କରେ ଅଧିକ ତଥ୍ୟ ଜାଣିବା ପାଇଁ ଉଭୟ କେନ୍ଦ୍ରର ଅଙ୍ଗନୱାଡ଼ି କର୍ମୀଙ୍କ ସହ ଯୋଗାଯୋଗ ଉଦ୍ୟମ କରାଯାଇଥିଲେ ମଧ୍ୟ ସମ୍ଭବ ହୋଇପାରିନଥିଲା। ସେହିପରି ଅଙ୍ଗନୱାଡ଼ି ସୁପରଭାଇଜର ଓ ସମ୍ପୃକ୍ତ ବିଭାଗୀୟ ଅଧିକାରୀଙ୍କ ସହ ମଧ୍ୟ ଯୋଗାଯୋଗ ହୋଇପାରିନଥିବାରୁ ଏଭଳି ସ୍ଥିତିର ପ୍ରକୃତ କାରଣ ସ୍ପଷ୍ଟ ହୋଇପାରିନାହିଁ।
ସରକାର ଅଙ୍ଗନୱାଡ଼ି କେନ୍ଦ୍ରଗୁଡ଼ିକର ସୁଚାରୁ ପରିଚାଳନା ପାଇଁ କର୍ମୀ ଓ ସୁପରଭାଇଜରଙ୍କ ବ୍ୟବସ୍ଥା କରିଥିବା ସତ୍ତ୍ୱେ ଏଭଳି ସ୍ଥିତି କାହିଁକି ଉପୁଜୁଛି, ତାହା ଏବେ ପ୍ରଶ୍ନବାଚୀ ସୃଷ୍ଟି କରିଛି। ଯଦି କୌଣସି କର୍ମୀ ନିଜ ଦାୟିତ୍ୱରେ ଅବହେଳା କରୁଛନ୍ତି, ତେବେ ସମ୍ପୃକ୍ତ ସୁପରଭାଇଜରଙ୍କ ତଦାରଖ ବ୍ୟବସ୍ଥା କେତେ ସକ୍ରିୟ, ତାହା ମଧ୍ୟ ଯାଞ୍ଚର ଆବଶ୍ୟକତା ରହିଛି।
ଅଙ୍ଗନୱାଡ଼ି କେନ୍ଦ୍ର କେବଳ ଏକ ସରକାରୀ କାର୍ଯ୍ୟାଳୟ ନୁହେଁ; ଏହା ଗ୍ରାମାଞ୍ଚଳର ଶିଶୁଙ୍କ ପୋଷଣ ଓ ପ୍ରାରମ୍ଭିକ ଶିକ୍ଷା ସହିତ ମହିଳାଙ୍କ ସ୍ୱାସ୍ଥ୍ୟସେବାର ଏକ ଗୁରୁତ୍ୱପୂର୍ଣ୍ଣ କେନ୍ଦ୍ର। ତେଣୁ ଏଠାରେ ଅନିୟମିତତା ହେଲେ ଏହାର ପ୍ରଭାବ ସିଧାସଳଖ ହିତାଧିକାରୀଙ୍କ ଉପରେ ପଡ଼ିବା ଆଶଙ୍କା ରହିଛି।
ଏଣୁ ଲକ୍ଷ୍ମୀପୁର ବ୍ଲକର ଅଙ୍ଗନୱାଡ଼ି କେନ୍ଦ୍ରଗୁଡ଼ିକର ବାସ୍ତବ ସ୍ଥିତି ଯାଞ୍ଚ କରିବା ସହ ମାଲିଗୁଡ଼ା ଓ ଗୌଡ଼ କଙ୍କଡ଼ାପୁଟ କେନ୍ଦ୍ରର ଘଟଣାର ତଦନ୍ତ କରିବାକୁ ଦାବି ହେଉଛି। ଦାୟିତ୍ୱରେ ଅବହେଳା ପ୍ରମାଣିତ ହେଲେ ନିୟମାନୁଯାୟୀ ପଦକ୍ଷେପ ନେବାକୁ ମଧ୍ୟ ଦାବି ଉଠିଛି। ଏହି ସ୍ଥିତି ସମ୍ପର୍କରେ ବିଭାଗୀୟ ଅଧିକାରୀ କେବେ ତଦନ୍ତ କରିବେ ଏବଂ କେନ୍ଦ୍ରଗୁଡ଼ିକର ସେବା କିପରି ସ୍ୱାଭାବିକ ହେବ, ତାହା ଉପରେ ଏବେ ଲକ୍ଷ୍ମୀପୁରବାସୀଙ୍କ ନଜର ରହିଛି।