ଦାରିଙ୍ଗବାଡ଼ି, (ଓଡ଼ିଶ୍ରୀ ସମ୍ବାଦ): କନ୍ଧମାଳ ଜିଲ୍ଲା ଦାରିଙ୍ଗବାଡ଼ିର ମହିଳା ଉଦ୍ୟୋଗୀ ଝରଣା ସାହୁ ଦିଲ୍ଲୀରେ ଆୟୋଜିତ ‘ଫ୍ରେମୱାର୍କ ଫର ହେରିଟେଜ ପ୍ରଡ୍ୟୁସ ଅଫ୍ ଇଣ୍ଡିଆ’ କାର୍ଯ୍ୟକ୍ରମରେ ଯୋଗଦେଇ କନ୍ଧମାଳ ହଳଦୀର ପାରମ୍ପରିକତା ଓ ବିଶେଷତ୍ୱକୁ ଉପସ୍ଥାପନ କରିଛନ୍ତି।
୩୫ଟି ମହିଳା ସ୍ୱୟଂ ସହାୟକ ଗୋଷ୍ଠୀକୁ ନେଇ ଗଠିତ ପ୍ରଡ୍ୟୁସର ଗ୍ରୁପର ପ୍ରତିନିଧି ଭାବେ ଝରଣା ଏହି କାର୍ଯ୍ୟକ୍ରମରେ ଯୋଗଦେଇଥିଲେ। ସେ କନ୍ଧମାଳ ହଳଦୀର ପାରମ୍ପରିକ ଚାଷ, ପ୍ରସ୍ତୁତି, ବ୍ରାଣ୍ଡିଂ ଓ ପ୍ୟାକେଜିଂ ସମ୍ପର୍କରେ ନିଜ ମତ ରଖିଥିଲେ।
କନ୍ଧମାଳ ହଳଦୀ ଜୈବିକ ପଦ୍ଧତିରେ ଚାଷ ହେଉଥିବାରୁ ଏହାର ଗୁଣବତ୍ତାକୁ ଆହୁରି ବୃଦ୍ଧି କରିବା ସହ ଦେଶ ଓ ବିଦେଶର ବଜାରରେ ଏହାକୁ ପହଞ୍ଚାଇବା ଉପରେ ଝରଣା ଗୁରୁତ୍ୱାରୋପ କରିଥିଲେ। କନ୍ଧମାଳ ହଳଦୀର ବିଶେଷତ୍ୱ ଓ ପାରମ୍ପରିକ ଚାଷ ପଦ୍ଧତିକୁ ବିଶ୍ୱସ୍ତରରେ ପହଞ୍ଚାଇବା ନେଇ ମଧ୍ୟ ସେ ମତ ରଖିଥିଲେ।
କାର୍ଯ୍ୟକ୍ରମରେ କନ୍ଧମାଳ ହଳଦୀର ଗୁଣବତ୍ତା, ପାରମ୍ପରିକତା ଓ ବିଶେଷତ୍ୱକୁ ଉପସ୍ଥାପନ କରି ଝରଣା ଜିଲ୍ଲାର ହଳଦୀ ଚାଷ ଓ ମହିଳା ଉଦ୍ୟୋଗୀଙ୍କ କାର୍ଯ୍ୟକୁ ଜାତୀୟସ୍ତରରେ ପରିଚିତ କରାଇଥିବା କୁହାଯାଇଛି। ଏଥିପାଇଁ ଅଞ୍ଚଳବାସୀ ଓ ହଳଦୀ ଚାଷୀମାନେ ତାଙ୍କୁ ପ୍ରଶଂସା କରିଛନ୍ତି।
ସୂଚନାଯୋଗ୍ୟ, ଏସିଆ ଏବଂ ବ୍ରିହି ଫାଉଣ୍ଡେସନ ପକ୍ଷରୁ ଏହି କାର୍ଯ୍ୟକ୍ରମ ଆୟୋଜିତ ହୋଇଥିବା ବେଳେ ଓରମାସ୍ (ଓଡ଼ିଶା ରୁରାଲ ଡେଭଲପମେଣ୍ଟ ସୋସାଇଟି)ର ମାର୍କେଟିଂ ସହାୟତାରେ ଝରଣା ସାହୁ ଦିଲ୍ଲୀ ଯାଇଥିଲେ।