ଭୁବନେଶ୍ୱର, (ଓଡ଼ିଶ୍ରୀ ସମ୍ବାଦ): କୋଟିଆ ପ୍ରସଙ୍ଗରେ ବିଜେପି ସରକାରଙ୍କ ନୀରବତାକୁ ନେଇ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପତ୍ର ଲେଖିଥିବାବେଳେ ବିଜେଡିର ଗଣମାଧ୍ୟମ ସଂଯୋଜକ ଡ. ଲେନିନ ମହାନ୍ତି ରାଜ୍ୟର ବିଜେପି ସରକାରଙ୍କୁ ସମାଲୋଚନା କରିଛନ୍ତି। କୋଟିଆରେ ଓଡ଼ିଶାର ପ୍ରଶାସନିକ ଉପସ୍ଥିତି ଓ ଭୌଗୋଳିକ ଅଖଣ୍ଡତା ରକ୍ଷା କରିବାରେ ସରକାର ବିଫଳ ହେଉଥିବା ସେ ଅଭିଯୋଗ କରିଛନ୍ତି।
ଡ. ମହାନ୍ତିଙ୍କ କହିବା ଅନୁଯାୟୀ, ନବୀନ ପଟ୍ଟନାୟକଙ୍କ ନେତୃତ୍ୱରେ ବିଜେଡି ସରକାରଙ୍କ ଶାସନକାଳରେ କୋଟିଆ ଅଞ୍ଚଳର ବିକାଶ ପାଇଁ ଦୀର୍ଘ ଦୁଇ ଦଶନ୍ଧିରୁ ଅଧିକ ସମୟ ଧରି ବିଭିନ୍ନ ପଦକ୍ଷେପ ନିଆଯାଇଥିଲା। ଏହାଦ୍ୱାରା ଅଞ୍ଚଳର ଭିତ୍ତିଭୂମି ବିକାଶ ସହ ଓଡ଼ିଶାର ପ୍ରଶାସନିକ ଉପସ୍ଥିତି ସୁଦୃଢ଼ ହୋଇଥିଲା ବୋଲି ସେ ଦାବି କରିଛନ୍ତି।
ବିଜେଡି ଶାସନରେ କୋଟିଆରେ ବିକାଶ ହୋଇଥିବା ଦାବି
ବିଜେଡି ପକ୍ଷରୁ କୁହାଯାଇଛି ଯେ ୨୦୦୦ରୁ ୨୦୨୪ ମଧ୍ୟରେ କୋଟିଆକୁ କୁଣ୍ଡୁଲି, ଡୋଲିଆମ୍ବା-ନାରିଙ୍ଗିପଦର, ଦେଓମାଳି ଓ ଅନ୍ୟାନ୍ୟ ଅଭ୍ୟନ୍ତରୀଣ ଅଞ୍ଚଳ ସହ ଯୋଡ଼ିବା ପାଇଁ ସଡ଼କ ସଂଯୋଗର ବିକାଶ କରାଯାଇଥିଲା। ଶିକ୍ଷା କ୍ଷେତ୍ରରେ ଓଡ଼ିଶା ଆଦର୍ଶ ବିଦ୍ୟାଳୟ, ଆଦିବାସୀ ବାଳକ ଓ ବାଳିକା ହଷ୍ଟେଲ, ଅଙ୍ଗନବାଡ଼ି କେନ୍ଦ୍ର, ବିଦ୍ୟାଳୟ ଭବନ ଓ ମାଗଣା ବସ୍ ସେବା ଭଳି ସୁବିଧା ଯୋଗାଇ ଦିଆଯାଇଥିଲା।
ସେହିପରି ୧୦ ଶଯ୍ୟା ବିଶିଷ୍ଟ ହସ୍ପିଟାଲ, ଉନ୍ନତ ସ୍ୱାସ୍ଥ୍ୟ ଉପକେନ୍ଦ୍ର, ମୋବାଇଲ୍ ଚିକିତ୍ସା ୟୁନିଟ୍ ଓ ପୋଲିସ ଥାନା ପ୍ରତିଷ୍ଠା ସହ ବିଦ୍ୟୁତ୍, ପାନୀୟ ଜଳ ଓ ମୋବାଇଲ୍ ସଂଯୋଗରେ ଉନ୍ନତି ଆଣାଯାଇଥିବା ଦଳ ପକ୍ଷରୁ କୁହାଯାଇଛି। ବିଜୁ ପକ୍କା ଘର ଯୋଜନାରେ ଅନେକ ପରିବାରକୁ ଘର ଯୋଗାଇ ଦିଆଯାଇଥିବା ସହ ଷ୍ଟ୍ରବେରୀ ଚାଷ, କୋଟିଆ ଝାଡ଼ୁର ବାଣିଜ୍ୟୀକରଣ ଓ ପଶୁପାଳନକୁ ମଧ୍ୟ ପ୍ରୋତ୍ସାହନ ଦିଆଯାଇଥିଲା।
ଏହାବ୍ୟତୀତ ପେନସନ୍, ରାସନ୍ ଓ ଅନ୍ୟାନ୍ୟ କଲ୍ୟାଣକାରୀ ଯୋଜନା ସହ ଓଡ଼ିଆ ଭାଷା, ସଂସ୍କୃତି ଓ ରଥଯାତ୍ରା ଭଳି ପର୍ବପର୍ବାଣୀକୁ ପ୍ରୋତ୍ସାହିତ କରାଯାଇଥିଲା। ୨୦୨୪ ସୁଦ୍ଧା ଏହି କାର୍ଯ୍ୟରେ ୧୦୮ କୋଟି ଟଙ୍କାରୁ ଅଧିକ ବ୍ୟୟ ହୋଇଥିବା ବିଜେଡି ଦାବି କରିଛି।
ବିଜେପି ସରକାରଙ୍କ ଉପରେ ପ୍ରତିଶ୍ରୁତି ପୂରଣ ନକରିବାର ଅଭିଯୋଗ
୨୦୨୪ ଜୁନ୍ରେ କ୍ଷମତାକୁ ଆସିଥିବା ବିଜେପି ସରକାର କୋଟିଆ ପ୍ରସଙ୍ଗରେ ନିଜର ପ୍ରତିଶ୍ରୁତି ପୂରଣ କରିନଥିବା ଡ. ମହାନ୍ତି ଅଭିଯୋଗ କରିଛନ୍ତି। ନିର୍ବାଚନ ପୂର୍ବରୁ ବିଜେପି ନେତାମାନେ ‘ଡବଲ୍ ଇଞ୍ଜିନ୍’ ସରକାର ଗଠନ ହେଲେ କୋଟିଆ ବିବାଦର ସ୍ଥାୟୀ ସମାଧାନ କରାଯିବ ଓ ଓଡ଼ିଆ ଗୌରବର ସୁରକ୍ଷା ହେବ ବୋଲି କହିଥିଲେ। କିନ୍ତୁ ଏଯାଏଁ ସେହି ପ୍ରତିଶ୍ରୁତି ଅନୁଯାୟୀ ଠୋସ୍ ପଦକ୍ଷେପ ଦେଖିବାକୁ ମିଳୁନଥିବା ସେ କହିଛନ୍ତି।
ବିଜେଡିର ଅଭିଯୋଗ ଅନୁସାରେ, ଆନ୍ଧ୍ରପ୍ରଦେଶରେ ଟିଡିପି ସରକାର ଥିବାବେଳେ ଫାଗୁନସିନେରି, ଗଞ୍ଜେଇପଦର ଓ ଫାତୁସିନେରି ଭଳି ବିବାଦୀୟ ଗାଁରେ ପଞ୍ଚାୟତ ନିର୍ବାଚନ କରାଇବାକୁ ପୁଣି ଉଦ୍ୟମ ହୋଇଛି। ଏହି ପ୍ରସଙ୍ଗରେ ସୁପ୍ରିମକୋର୍ଟଙ୍କ ସ୍ଥିତାବସ୍ଥା ଆଦେଶର ଉଲ୍ଲଂଘନ ହେଉଥିବା ଦଳ ଅଭିଯୋଗ କରିଛି। ୨୦୨୫ରେ ଗଠିତ ୧୬ ସଦସ୍ୟ ବିଶିଷ୍ଟ ଉଚ୍ଚସ୍ତରୀୟ କୋଟିଆ କମିଟିର ସୁପାରିଶ ଓ ତାହା ଉପରେ ନିଆଯାଇଥିବା ପଦକ୍ଷେପକୁ ସରକାର ସାର୍ବଜନୀନ କରିବା ଉଚିତ ବୋଲି ବିଜେଡି ଦାବି କରିଛି।
କୋଟିଆରେ ଓଡ଼ିଶାର ଅଧିକାର ରକ୍ଷା ପାଇଁ ବିଜେଡିର ଦାବି
ବିଜେଡି ପକ୍ଷରୁ କୁହାଯାଇଛି ଯେ କୋଟିଆରେ ୨୮ଟି ଗାଁ ରହିଥିବାବେଳେ ସେଥିରୁ ୨୧ଟି ଗାଁକୁ ନେଇ ବିବାଦ ରହିଛି। ଏହି ସୀମା ବିବାଦ ୧୯୬୮ରୁ ସୁପ୍ରିମକୋର୍ଟରେ ବିଚାରାଧୀନ ଥିବା ଏବଂ ଓଡ଼ିଶା ସରକାର ୨୦୨୨ ଜାନୁଆରୀରେ ନିଜ ଦାବିର ସୁରକ୍ଷା ପାଇଁ ନୂଆ ମାମଲା ଦାଖଲ କରିଥିବା ଦଳ ଉଲ୍ଲେଖ କରିଛି।
ବିବାଦୀୟ ଗାଁଗୁଡ଼ିକରେ ଆନ୍ଧ୍ରପ୍ରଦେଶର ନିର୍ବାଚନୀ କାର୍ଯ୍ୟକଳାପ ରୋକିବା, ସୁପ୍ରିମକୋର୍ଟରେ ଆବଶ୍ୟକ ଆଇନଗତ ପଦକ୍ଷେପ ନେବା, ୨୦୨୫ର କୋଟିଆ କମିଟିର ସମ୍ପୂର୍ଣ୍ଣ ସୁପାରିଶ ଓ ସରକାରଙ୍କ କାର୍ଯ୍ୟାନୁଷ୍ଠାନକୁ ସାର୍ବଜନୀନ କରିବା ସହ ଓଡ଼ିଶାର ଭୌଗୋଳିକ ସ୍ୱାର୍ଥକୁ ରାଜନୈତିକ ମେଣ୍ଟର ହିତଠାରୁ ଊର୍ଦ୍ଧ୍ୱରେ ରଖିବାକୁ ବିଜେଡି ଦାବି କରିଛି।
କୋଟିଆ ଓ ଓଡ଼ିଶାର ଲୋକେ ରାଜ୍ୟର ଭୌଗୋଳିକ ଅଖଣ୍ଡତା ନେଇ କୌଣସି ଆପୋଷକୁ ଗ୍ରହଣ କରିବେ ନାହିଁ ବୋଲି ଦଳ କହିଛି। କୋଟିଆର ବାସିନ୍ଦାଙ୍କ ଅଧିକାର ଓ ଓଡ଼ିଶାର ସ୍ୱାର୍ଥର ସୁରକ୍ଷା ପାଇଁ ବିଜେଡି ଦୃଢ଼ ଭାବେ ଲଢ଼ିବ ବୋଲି ଦଳ ପକ୍ଷରୁ କୁହାଯାଇଛି।