ବରୀ (ଓଡ଼ିଶ୍ରୀ ସମ୍ବାଦ): ରାସ୍ତା ଅଛି, ହେଲେ ଚାଲିବା ଦୁର୍ବିସହ। ଗାଁରୁ ସହରକୁ ଯାତାୟାତ ହେଉ କି ଜରୁରୀ ସ୍ୱାସ୍ଥ୍ୟସେବା, ପ୍ରତିଦିନ ହଜାର ହଜାର ଲୋକ ନିର୍ଭର କରୁଥିବା ଯାଜପୁରରୁ ବାଙ୍ଗରା ଭାୟା ବିଂଝାରପୁର ଓ ସିଂହପୁର ରାସ୍ତାର ଦୁର୍ଦ୍ଦଶାକୁ ନେଇ ଅସନ୍ତୋଷ ବଢ଼ିଛି।
ପାଣିକୋଇଲି ପୂର୍ତ୍ତ ବିଭାଗ ଡିଭିଜନ୍ ଅଧୀନରେ ଥିବା ଏହି ରାସ୍ତାର ମରାମତି ଦାବିରେ ମାନବାଧିକାର କର୍ମୀ ସୀମାନ୍ତ କୁମାର ପାତ୍ରଙ୍କ ପକ୍ଷରୁ ବିଭାଗୀୟ କର୍ତ୍ତୃପକ୍ଷଙ୍କୁ ଲିଖିତ ଭାବେ ଅବଗତ କରାଯାଇଛି। ରାସ୍ତାର ବିଭିନ୍ନ ସ୍ଥାନର ଅବସ୍ଥା ଖରାପ ଥିବାରୁ ଯାତାୟାତରେ ସମସ୍ୟା ହେଉଥିବା ଅଭିଯୋଗପତ୍ରରେ ଦର୍ଶାଯାଇଛି।
ଦାବି ଅନୁଯାୟୀ, ବରୀ, ବିଂଝାରପୁର, ଦଶରଥପୁର, ଆଳି ଓ ରାଜକନିକା ଅଞ୍ଚଳର ପ୍ରାୟ ୩୦ ହଜାର ଲୋକ ଏହି ରାସ୍ତା ଉପରେ ଯାତାୟାତ ପାଇଁ ନିର୍ଭରଶୀଳ। ସ୍ୱାସ୍ଥ୍ୟସେବା, ସରକାରୀ କାର୍ଯ୍ୟ, ବ୍ୟବସାୟ ସମେତ ବିଭିନ୍ନ କାମ ପାଇଁ ଏହି ରାସ୍ତାର ଗୁରୁତ୍ୱ ରହିଥିବା କୁହାଯାଇଛି।
ଆସନ୍ତା ପାର୍ବଣ ଋତୁରେ ରାସ୍ତାରେ ଯାନବାହାନ ଓ ଲୋକଙ୍କ ଯାତାୟାତ ବଢ଼ିବାର ସମ୍ଭାବନା ଥିବାରୁ ବର୍ତ୍ତମାନର ଅବସ୍ଥାରେ ଦୁର୍ଘଟଣା ଆଶଙ୍କା ମଧ୍ୟ ପ୍ରକାଶ ପାଇଛି। ରାସ୍ତା ମରାମତି ନେଇ ବିଭାଗୀୟ ଅଧିକାରୀଙ୍କ ସହ ଯୋଗାଯୋଗ କରାଯାଇଥିଲେ ମଧ୍ୟ କାମ କେବେ ଆରମ୍ଭ ହେବ, ସେନେଇ ସ୍ପଷ୍ଟ ସୂଚନା ମିଳିନଥିବା ଅଭିଯୋଗକାରୀ କହିଛନ୍ତି।
ଏହି ପରିପ୍ରେକ୍ଷିରେ ୨୭ ସେପ୍ଟେମ୍ବର ୨୦୨୬ ସୁଦ୍ଧା ରାସ୍ତା ମରାମତି କାର୍ଯ୍ୟ ଆରମ୍ଭ କରିବାକୁ ସମୟସୀମା ଦିଆଯାଇଛି। ନିର୍ଦ୍ଧାରିତ ସମୟ ମଧ୍ୟରେ କାମ ଆରମ୍ଭ ନହେଲେ, ୨୮ ସେପ୍ଟେମ୍ବରରେ ସ୍ଥାନୀୟ କିଛି ସଚେତନ ନାଗରିକଙ୍କ ପକ୍ଷରୁ ରାସ୍ତାର ଏକ ସମ୍ବେଦନଶୀଳ ସ୍ଥାନରେ ରାସ୍ତାରୋକ ସହ ୩ ଘଣ୍ଟିଆ ପ୍ରତୀକାତ୍ମକ ଧାରଣା ଦିଆଯିବ ବୋଲି ଚେତାବନୀ ଦିଆଯାଇଛି।