ଭଦ୍ରକ (ଓଡ଼ିଶ୍ରୀ ସମ୍ବାଦ): ଭଦ୍ରକରେ ବିଶ୍ୱବିଦ୍ୟାଳୟ ଓ ମେଡିକାଲ କଲେଜ ଭଳି ବଡ଼ ପ୍ରକଳ୍ପକୁ ନେଇ ଆଶା ବଢ଼ୁଥିବା ବେଳେ ସହରର ମୌଳିକ ସମସ୍ୟାକୁ ନେଇ ପ୍ରଶ୍ନ ଉଠିଛି। ସାମାନ୍ୟ ବର୍ଷାରେ ସହରର ବିଭିନ୍ନ ଅଞ୍ଚଳ ଜଳମଗ୍ନ ହେଉଥିବାରୁ ଡ୍ରେନେଜ୍ ବ୍ୟବସ୍ଥାର ସ୍ଥିତି ନେଇ ସ୍ଥାନୀୟ ଲୋକେ ଚିନ୍ତା ପ୍ରକାଶ କରିଛନ୍ତି।
ବିଶେଷକରି ଭଦ୍ରକ ସ୍ୱୟଂଶାସିତ ମହାବିଦ୍ୟାଳୟର ମୁଖ୍ୟ ରାସ୍ତାର ଅବସ୍ଥାକୁ ନେଇ ଛାତ୍ରଛାତ୍ରୀ, ଅଭିଭାବକ ଓ ସ୍ଥାନୀୟ ଲୋକଙ୍କ ଅସନ୍ତୋଷ ଦେଖାଦେଇଛି। ରାସ୍ତା ପାର୍ଶ୍ୱରେ ଉପଯୁକ୍ତ ଡ୍ରେନେଜ୍ ନଥିବାରୁ ବର୍ଷାଜଳ ନିଷ୍କାସନ ହୋଇନପାରି ରାସ୍ତାରେ ପାଣି ଜମି ଯାତାୟାତ ପ୍ରଭାବିତ ହେଉଥିବା କୁହାଯାଇଛି। ଲଘୁଚାପଜନିତ ବର୍ଷା ପରେ ସହରର ବିଭିନ୍ନ ସ୍ଥାନରେ ଜଳବନ୍ଦୀ ସ୍ଥିତି ମଧ୍ୟ ଦେଖାଦେଇଛି। କେତେକ ସ୍ଥାନରେ ରାସ୍ତା ଉପରେ ପାଣି ଜମିଥିବା ବେଳେ ଘର ଓ ବ୍ୟବସାୟିକ ପ୍ରତିଷ୍ଠାନକୁ ମଧ୍ୟ ବର୍ଷାଜଳ ପଶିଥିବା ଦେଖାଯାଇଛି।
ଭଦ୍ରକ ଓଟି ମାର୍କେଟ ଅଞ୍ଚଳର ସାଇରାମ ମେଡିସିନ୍ ଷ୍ଟୋର ସମ୍ମୁଖରେ ପାଣି ଜମିବା ସହ ଦୋକାନ ଭିତରକୁ ମଧ୍ୟ ବର୍ଷାଜଳ ପଶିଥିବା ଦୃଶ୍ୟ ସାମ୍ନାକୁ ଆସିଛି। ଏହା ଯୋଗୁଁ ବ୍ୟବସାୟୀମାନେ ଅସୁବିଧାରେ ପଡ଼ିଥିବା କୁହାଯାଇଛି।
ସହରର ଅନେକ ସ୍ଥାନରେ ଡ୍ରେନ୍ ନିୟମିତ ସଫେଇ ହେଉନଥିବାରୁ ବର୍ଷାଜଳ ନିଷ୍କାସନ ବାଧାପ୍ରାପ୍ତ ହେଉଥିବା ସ୍ଥାନୀୟ ଲୋକେ କହିଛନ୍ତି। ଡ୍ରେନ୍ରେ ଆବର୍ଜନା ଜମି ରହିବା ଏବଂ ଜଳ ନିଷ୍କାସନ ପାଇଁ ପର୍ଯ୍ୟାପ୍ତ ବ୍ୟବସ୍ଥା ନଥିବାରୁ ପ୍ରତିବର୍ଷ ବର୍ଷା ଋତୁରେ ସମାନ ସମସ୍ୟା ଦେଖାଦେଉଥିବା ସେମାନେ ଦାବି କରିଛନ୍ତି। ବର୍ଷା ପୂର୍ବରୁ ଡ୍ରେନ୍ ସଫେଇ ହୋଇଥିଲେ ମଧ୍ୟ ଜଳବନ୍ଦୀ କାହିଁକି ହେଉଛି ଏବଂ ଏହାର ସ୍ଥାୟୀ ସମାଧାନ ପାଇଁ କେବେ ପଦକ୍ଷେପ ନିଆଯିବ, ସେନେଇ ଲୋକେ ପ୍ରଶ୍ନ ଉଠାଇଛନ୍ତି।
ଜଳବନ୍ଦୀ ସହ ଭଦ୍ରକ ପୌରାଞ୍ଚଳର କେତେକ ୱାର୍ଡରେ ଷ୍ଟ୍ରିଟ୍ ଲାଇଟ୍ ସମସ୍ୟା ମଧ୍ୟ ରହିଥିବା ଅଭିଯୋଗ ହୋଇଛି। ବିଶେଷକରି ୨୬ ନମ୍ବର ୱାର୍ଡର କେତେକ ଅଞ୍ଚଳରେ ବିଦ୍ୟୁତ ଖୁଣ୍ଟରେ ଷ୍ଟ୍ରିଟ୍ ଲାଇଟ୍ ନଥିବାରୁ ରାତିରେ ଲୋକଙ୍କ ଯାତାୟାତରେ ସମସ୍ୟା ହେଉଥିବା କୁହାଯାଇଛି।
ସ୍ଥାନୀୟ ଲୋକଙ୍କ ଦାବି, ଭଦ୍ରକ ସହରର ଡ୍ରେନେଜ୍ ବ୍ୟବସ୍ଥାର ସମଗ୍ର ସମୀକ୍ଷା କରାଯାଇ ଜଳବନ୍ଦୀ ସମସ୍ୟାର ସ୍ଥାୟୀ ସମାଧାନ କରାଯାଉ। ଏଥିସହ ନିୟମିତ ଡ୍ରେନ୍ ସଫେଇ, ଆବର୍ଜନା ପରିଚାଳନା, ଷ୍ଟ୍ରିଟ୍ ଲାଇଟ୍ ଓ ରାସ୍ତାଘାଟର ଉନ୍ନତି ଉପରେ ଗୁରୁତ୍ୱ ଦେବାକୁ ସେମାନେ ଦାବି କରିଛନ୍ତି। ଭଦ୍ରକରେ ବିଶ୍ୱବିଦ୍ୟାଳୟ କିମ୍ବା ମେଡିକାଲ କଲେଜ ଭଳି ବଡ଼ ପ୍ରକଳ୍ପ ନେଇ ଲୋକଙ୍କ ଆଶା ରହିଥିବା ବେଳେ ରାସ୍ତା, ଡ୍ରେନେଜ୍, ଆଲୋକ ଓ ପରିମଳ ଭଳି ମୌଳିକ ସୁବିଧାର ସୁଧାରକୁ ମଧ୍ୟ ସମାନ ଗୁରୁତ୍ୱ ଦେବାକୁ ସହରବାସୀ ଦାବି କରିଛନ୍ତି। ବର୍ଷା ସମୟରେ ଜଳବନ୍ଦୀ ନହେବା ପାଇଁ ଦୀର୍ଘମିଆଦୀ ଯୋଜନା ସହ ତାହାର କାର୍ଯ୍ୟକାରୀ ରୂପାୟଣ ଉପରେ ଏବେ ନଜର ରହିଛି।