ଭୁବନେଶ୍ୱର: ବଙ୍ଗୋପସାଗରରେ ସୃଷ୍ଟ ଲଘୁଚାପକୁ ନେଇ ଓଡ଼ିଶାରେ ପାଣିପାଗ ବଦଳିବାରେ ଲାଗିଛି। ଭାରତୀୟ ପାଣିପାଗ ବିଭାଗ (IMD) ଅନୁସାରେ, ଉତ୍ତର-ପଶ୍ଚିମ ବଙ୍ଗୋପସାଗର ଉପରେ ଥିବା ସ୍ପଷ୍ଟ ଲଘୁଚାପ କ୍ଷେତ୍ର ଆଗାମୀ ୪୮ ଘଣ୍ଟା ମଧ୍ୟରେ ଡିପ୍ରେସନ୍ ଓ ପରେ ଡିପ୍ ଡିପ୍ରେସନ୍ରେ ପରିଣତ ହେବାର ସମ୍ଭାବନା ରହିଛି।
ଏହି ପାଣିପାଗ ପ୍ରଣାଳୀର ପ୍ରଭାବରେ ଆସନ୍ତା ୨୨ ତାରିଖରୁ ଓଡ଼ିଶାରେ ବର୍ଷାର ପ୍ରଭାବ ବଢ଼ିବ। ୨୩ ଓ ୨୪ ତାରିଖରେ ରାଜ୍ୟରେ ଅତି ପ୍ରବଳ ବର୍ଷାର ଚେତାବନୀ ଦିଆଯାଇଥିବା ବେଳେ ୨୫ ତାରିଖରେ ମଧ୍ୟ ପ୍ରବଳ ବର୍ଷା ଜାରି ରହିପାରେ।
ପାଣିପାଗ ପ୍ରଣାଳୀଟି ପଶ୍ଚିମ-ଉତ୍ତରପଶ୍ଚିମ ଦିଗକୁ ଗତି କରିବା ସହ ଦକ୍ଷିଣ ଓଡ଼ିଶା ଏବଂ ଉତ୍ତର ଆନ୍ଧ୍ର ଉପକୂଳ ଉପରେ ପ୍ରଭାବ ପକାଇପାରେ। ଫଳରେ ଦକ୍ଷିଣ ଓ ଉପକୂଳ ଓଡ଼ିଶାର ଅନେକ ସ୍ଥାନରେ ଭାରୀରୁ ଅତି ଭାରୀ ବର୍ଷା ସହ ଘଡ଼ଘଡ଼ି ଓ ଝଟକା ପବନର ଆଶଙ୍କା ରହିଛି।
ଗୋପାଳପୁର ଅଞ୍ଚଳର ପୂର୍ବାନୁମାନରେ ୨୩ ତାରିଖରେ ଅତି ପ୍ରବଳ ବର୍ଷା ଏବଂ ୨୪ ତାରିଖରେ ଅତି ପ୍ରବଳ ବର୍ଷା ସହ ଘଡ଼ଘଡ଼ି ଓ ୫୦ରୁ ୬୦ କିମି ବେଗରେ ପବନର ସମ୍ଭାବନା ଦର୍ଶାଯାଇଛି।
ତେବେ ଏହି ଲଘୁଚାପ ପରବର୍ତ୍ତୀ ସମୟରେ ବାତ୍ୟାର ରୂପ ନେବ କି ନାହିଁ, ତାହା ଏବେଠାରୁ ନିଶ୍ଚିତ ନୁହେଁ। ପାଣିପାଗ ବିଭାଗ ପକ୍ଷରୁ ପ୍ରଣାଳୀର ଗତିବିଧି ଉପରେ ନଜର ରଖାଯାଉଛି।
ମତ୍ସ୍ୟଜୀବୀଙ୍କ ପାଇଁ ସତର୍କତା: ସମୁଦ୍ର ଅଶାନ୍ତ ରହିବାର ସମ୍ଭାବନା ଥିବାରୁ ସମୁଦ୍ରକୁ ଯିବା ସମ୍ପର୍କରେ ସ୍ଥାନୀୟ ଓ ପାଣିପାଗ ବିଭାଗର ସତର୍କତା ଅନୁସରଣ କରିବାକୁ କୁହାଯାଇଛି।