ଯାଜପୁର (ଓଡ଼ିଶ୍ରୀ ସମ୍ବାଦ): ଚଣ୍ଡିଖୋଲ-ଡଙ୍କାରି ଅଞ୍ଚଳରେ ପ୍ରସ୍ତାବିତ ଷ୍ଟ୍ରାଟେଜିକ୍ ପେଟ୍ରୋଲିୟମ୍ ରିଜର୍ଭ (SPR) ପ୍ରକଳ୍ପର ଅଗ୍ରଗତି ନେଇ ଯାଜପୁର ସାଂସଦ ଡକ୍ଟର ରବୀନ୍ଦ୍ର ନାରାୟଣ ବେହେରା ISPRLର ମୁଖ୍ୟ ଶ୍ରୀ ଏସ୍. କେ. ବାଜପେୟୀଙ୍କ ସହ ଆଲୋଚନା କରିଛନ୍ତି।
ସୂଚନା ଅନୁଯାୟୀ, ନୂଆଦିଲ୍ଲୀରେ ISPRL ମୁଖ୍ୟଙ୍କୁ ସାକ୍ଷାତ କରି ସାଂସଦ ଚଣ୍ଡିଖୋଲ-ଡଙ୍କାରି ଅଞ୍ଚଳରେ ହେବାକୁ ଥିବା ୪ ମିଲିୟନ୍ ମେଟ୍ରିକ୍ ଟନ୍ କ୍ଷମତା ବିଶିଷ୍ଟ SPR ପ୍ରକଳ୍ପର ଅଗ୍ରଗତି ସମ୍ପର୍କରେ ଆଲୋଚନା କରିଥିବା କୁହାଯାଇଛି। ISPRLର ବାର୍ଷିକ ରିପୋର୍ଟ ଅନୁଯାୟୀ, ଚଣ୍ଡିଖୋଲରେ ୪.୦ MMT କ୍ଷମତାର SPR ପାଇଁ ଓଡ଼ିଶା ସରକାରଙ୍କ ନୀତିଗତ ଅନୁମୋଦନ ଓ ISPRL ସହ ଏମ୍ଓୟୁ ସ୍ୱାକ୍ଷର ହୋଇଛି।
ସାଂସଦଙ୍କ ମତାନୁସାରେ, ଏହି ପ୍ରକଳ୍ପ ଦେଶର ଦୀର୍ଘମିଆଦୀ ଊର୍ଜା ସୁରକ୍ଷା ଓ ତୈଳ ଯୋଗାଣର ସ୍ଥିରତାକୁ ସୁଦୃଢ଼ କରିବାରେ ସହାୟକ ହେବ। ଭବିଷ୍ୟତରେ ତୈଳ ଯୋଗାଣରେ ବାହ୍ୟ ବାଧା ସୃଷ୍ଟି ହେଲେ ଏହି ରଣନୈତିକ ଭଣ୍ଡାର ଦେଶ ପାଇଁ ଗୁରୁତ୍ୱପୂର୍ଣ୍ଣ ସୁରକ୍ଷା କବଚ ଭାବେ କାମ କରିପାରିବ ବୋଲି ସେ କହିଛନ୍ତି।
ଏହାସହ ପ୍ରକଳ୍ପ ଦ୍ୱାରା ଓଡ଼ିଶା, ବିଶେଷକରି ଯାଜପୁର ଜିଲ୍ଲାରେ ଶିଳ୍ପ, ନିଯୁକ୍ତି ଓ ଅର୍ଥନୈତିକ ବିକାଶର ସୁଯୋଗ ସୃଷ୍ଟି ହେବ ବୋଲି ସାଂସଦ ମତ ଦେଇଛନ୍ତି।
ବଡ଼ଚଣା ବିଧାୟକ ଅମର କୁମାର ନାୟକ ମଧ୍ୟ ଏହି ପ୍ରକଳ୍ପ ଦ୍ୱାରା ଯାଜପୁର ଜିଲ୍ଲାରେ ନୂତନ ନିଯୁକ୍ତି ସୁଯୋଗ ସୃଷ୍ଟି ହେବ ବୋଲି ମତ ପ୍ରକାଶ କରିଛନ୍ତି। କେନ୍ଦ୍ର ସରକାରଙ୍କ ଅନୁଯାୟୀ, ଚଣ୍ଡିଖୋଲ SPR ପ୍ରକଳ୍ପର ନିର୍ମାଣ ପର୍ଯ୍ୟାୟରେ ପ୍ରତ୍ୟକ୍ଷ ଓ ପରୋକ୍ଷ ନିଯୁକ୍ତି ସୁଯୋଗ ସୃଷ୍ଟି ହେବାର ଆଶା ରହିଛି।